Miku që vjen kaq rrallë, mëshira vjen me të (Poezi)

Miku që vjen kaq rrallë, mëshira vjen me të

Bekim Bici

                                                                 

E Arritëm edhe një herë këtë ditë...
Ashtu si flladi që na çel sytë,
Është edhe Ramazani.
Na çel dritaret e shpirtit
dhe na hap rrugët e xhenetit,
Ky mik që vjen kaq rrallë...

Muaji gjatë të cilit zbriti
ai që është dituri mbi dituri,
Ai që Shkencën të vëlojë e bën.
Kurani...
shpirti i gjithësisë.

Edhe një herë e arritëm pranverën në jetën tonë.
Pranverë por jo me një lule nuk vjen
Ndonëse e kemi këtë farë duhet ta shumojmë
Pasi atëherë do të jetë bereqet i pafundëm.

Kjo pranverë kërkon sakrificë prej nesh
Sakrificë që të kalitur na bën,
Të kalitur për të përballuar stinët e tjera
dhe në fund për të na dhënë atë që të gjithë kërkojmë
Dashurinë...
Kënaqësinë e Zotit ndaj nesh.

Çdo gjë që bëjmë në këtë jetë, është për veten tonë,
Por Ky muaj është për Allahun.
Kalimtare është kjo jetë...
dhe ne kalimtarët e rradhës
me peripecitë tona.
Një muaj në 12, është pranverë e vërtetë.
Është kalitja jonë për t’u bërë ballë
armiqve tanë.

Kalitje...
Kalitje për t’i bërë ballë armikut më të fuqishëm.
Më i fuqishmi ndër armiqt është...
Vetja jonë...
Egoja,
Epshet,
Mendjemadhësia.
Gënjeshtra,
janë guerrilët që ne duhet të mposhtim.
Janë guerrilët që shoqërojnë
Gjeneralin e vetë shpallur,
Veten tonë...

Gjeneral,
por në vend që të thurë strategji për shpëtim,
në humbje të çon,
ndonëse pa e kuptuar me kundërshtarin më të keq bashkëpunon dhe përfundimi është i qartë...

Nëse në këtë muaj O Zot i gjithësisë, nuk gjejmë Shpëtimin, ai prej nesh do të largohet shumë.

O i Madhi Allah: “ Unë kam bërë gabim pas gabimi, e ti më dhe të mirë pas të mire, unë kam bërë gjunah pas gjunahu dhe ti më bekove me sevape. Unë o Allah jam një robi yt, i pashpresë nëse nuk ekziston Ti, jam i humbur, nëse Ti nuk më shpëton. Unë jam i padenjë për faljen tënde, por unë e di, ti je i Gjithëmëshirshëm, Mëkatfalës, për këtë shpresoj, për faljen dhe mëshirën Tënde. Unë më diamantin e gjithë universit, arin e argjendin dhe çdo gjë tjetër sikur të kem, nuk mund të shpaguaj jetën që ti më dhe. Edhe këto që përmenda përsëri Ti na i ke dhënë. O Allah Ti e di gjendjen time, Ti e di të dukeshmen e të padukshmen, Ti e di atë që unë e shfaq dhe atë që nuk e shfaq, Ti e di brendësinë e zemrës sime, të lutem O Allah këtë muaj, Të begatë bëje për ne.! O Allah jam i pafuqishëm, më fuqizo aq sa është e nevojshme! O Zot jam Mëkatarë, deri në grykë jam i mbushur me këto gjunahe, Më fal o Mëkatfalës, Krijues i Universit!
Unë jam hiç para forcës, dhe Mëshirës tënde. Më mëshiro mua, më fal mua dhe bëje për mua këtë muaj të jetë shpëtim!